Ядзерна-фізічны комплекс «Яліна»
Унікальны ядзерна-фізічны комплекс «Яліна» створаны ў рамках праекта Міжнароднага навукова-тэхнічнага цэнтра пры ўдзеле Еўрапейскага саюза.
На сёняшні дзень комплекс «Яліна» з’яўляецца адзіным у Еўропе дзеючым ядзерна-фізічным комплексам, на якім вывучаюцца ядзерна-энергетычныя ўстаноўкі новага пакалення — падкрытычныя сістэмы, якія кіруюцца знешнімі крыніцамі, тады як у Японіі, Германіі, Швецыі, ЗША і іншых дзяржавах яны знаходзяцца на стадыі праектных распрацовак.
Гэтыя сістэмы прызначаны для вытворчасці энергіі і выпальвання (трансмутацыі) доўгажывучых радыяактыўных адходаў, назапашаных у выніку эксплуатацыі АЭС, а таксама валодаюць унутранай уласцівасцю бяспекі. Трэба адзначыць, што падкрытычныя рэактары разглядаюцца ў бліжэйшай перспектыве як найбольш шматабяцальны напрамак для атрымання энергіі.
На базе ЯФК «Яліна» сумесна з ядзернымі цэнтрамі Швецыі, Германіі і Іспаніі ствараецца Міжнародная навуковая лабараторыя, што дазваляе:
- пашырыць міжнароднае супрацоўніцтва і праводзіць сумесныя даследаванні ў галіне сучасных ядзерна-энергетычных сістэм і трансмутацыі ядзерных адходаў;
- залучаць заходнія фінансавыя інвестыцыі на правядзенне тэарэтычных і эксперыментальных даследаванняў, абнаўленне матэрыяльна-тэхнічнай базы інстытута;
- выкарыстоўваць комплекс «Яліна» для падрыхтоўкі аспірантаў і спецыялістаў з Беларусі і краін Еўрасаюза ў галіне сучаснай ядзернай энергетыкі і абыходжання з радыеактыўнымі адходамі, якія становяцца прыярытэтнымі для многіх краін з абмежаванымі запасамі паліўна-энергетычных рэсурсаў.
