Юбілейны Фестываль навукі ў Батанічным садзе наведала звыш 20 тыс. чалавек
Больш за 20 тыс. чалавек наведалі буйнейшае ў нашай краіне навукова-папулярнае мерапрыемства – Фестываль навукі-2023, які прайшоў 2 верасня ў Цэнтральным батанічным садзе НАН Беларусі.
Мерапрыемства праводзілася ўжо пяты раз. І, як адзначаюць арганізатары, з кожным годам цікавасць да яго ўзрастае — расце не толькі колькасць наведвальнікаў фестывалю, але і яго ўдзельнікаў.
Так, сёлета ўпершыню ў Фестывалі навукі прынялі ўдзел прадстаўнікі з Расійскай Федэрацыі: навукова-пазнавальны цэнтр “Запаведнае пасольства” парка “Зараддзе” і РХТУ ім. Мендзялеева з майстар-класамі і навуковымі шоу. Яшчэ адной навінкай юбілейнага фестывалю стала зона Sci-fi – пляцоўка на стыку навукі і фантастыкі.
Пра ўсё, што звязана са здароўем (ад галаўнога болю да хвароб крыві) удзельнікі фестывалю маглі даведацца на традыцыйнай пляцоўцы “Медыцына”. Навукоўцы і лекары ў гэты дзень прыадчынілі заслону таямніцы ў працэсы, якія дазваляюць атрымліваць сучасныя лекі, і ў з’явы, якія праходзяць унутры нас саміх.
У рамках пляцоўкі “Космас” была арганізавана серыя лекцый пра касмічныя аб’екты і іх даследаванне, тэлескопы і спадарожнікі. У рабоце лакацыі “Космас” прыняў удзел лётчык-касманаўт Расійскай Федэрацыі, Герой РФ, член атрада касманаўтаў Навукова-даследчага выпрабавальнага цэнтра падрыхтоўкі касманаўтаў ім. Ю. А. Гагарына Алег Навіцкі. Кандыдаты на касмічны палёт ад Беларусі Марына Васілеўская і Анастасія Лянкова расказалі аб падрыхтоўцы да палёту і адказалі на пытанні наведвальнікаў пляцоўкі.
У рамках зоны “Робаты” ўжо пяты раз сабраліся лепшыя школы і арганізацыі краіны ў сферы STEAM-адукацыі і робататэхнікі. Кожны ўдзельнік змог спраектаваць, сабраць і запраграмаваць робата, ацаніць магчымасці штучнага інтэлекту, а таксама патрапіць на сапраўдны канцэрт аркестра робатаў. Тут жа – на пляцоўцы фестывалю – адбыліся спаборніцтвы па адукацыйнай робататэхніцы. Удзельнікі стваралі робатаў, якія маглі пераадольваць перашкоды, змагацца адзін з адным на рынгу і гуляць у футбол.
На фестывалі працавала пляцоўка “ATOM TEAM”, арганізаваная ІЦАЭ г. Мінска пры падтрымцы Інжынірынгавага дывізіёна Дзяржкарпарацыі “Расатам”. Наведвальнікаў чакалі інжынерныя майстар-класы і інтэлектуальныя гульні, навуковыя інтэрактывы і атамныя віктарыны. Любы жадаючы мог запусціць ланцуговую рэакцыю, разагнаць Кола Да Вінчы або сабраць радыёпрыёмнік, які працуе без батарэек, шпульку Теслы, якая запальвае лямпачкі без правадоў, і камеру Вільсана, у якой можна ўбачыць радыяцыю.
Вялікае значэнне для будучага чалавецтва мае беражлівае стаўленне да прыроды і навакольнага асяроддзя. Таму на мерапрыемстве была арганізавана пляцоўка “Экалогія”, дзе кожны мог даведацца больш пра правілы сартавання смецця, важнасць азонавага слою, небяспеку ультрафіялетавага выпраменьвання, а таксама пра тое, як працуюць бактэрыі і чым “пахне” мікрабіялогія.
Як адзначыў пасля цырымоніі ўрачыстага адкрыцця Фестывалю Старшыня Прэзідыума НАН Уладзімір Гусакоў, важна пазнаёміць моладзь з дасягненнямі навукі, паказаць, на што яна здольна, як адбываюцца навуковыя даследаванні, якія можна атрымаць вынікі. “На фестывалі вельмі шмат дзяцей, і мы хацелі б зацікавіць іх, каб яны з ранніх гадоў захапляліся навукай. І ў свой час прыйшлі ва ўніверсітэты, а затым і ў навуку. Наша задача – не столькі прэзентаваць складаныя навукаёмістыя тэхналогіі, колькі паказаць, наколькі навука цікавая і прывабная», – падкрэсліў ён.
фота Таццяны ЛІСАТОВІЧ.
Архіў навін
